1Jo 2 | MED | STEP | Enim na nga kangambuⱡa kᵾⱡ, ya mon rop ngont ei, kandᵾk kᵾn, uⱡ kit mbᵾ iti nᵾtᵾi! Wote, enim ti ndi, uⱡ kit em ndam, Jisas Kraist ei, Wu Kun Kai ei, Tipam kᵾn morum ei ndi, tᵾn tᵾpa rapᵾndᵾmba.

1 John 2

Kraist Ei, Tᵾn Nga Tᵾpa Rᵾpᵾndi Wu Ei Morum

1 Enim na nga kangambuⱡa kᵾⱡ, ya mon rop ngont ei, kandᵾk kᵾn, uⱡ kit mbᵾ iti nᵾtᵾi! Wote, enim ti ndi, uⱡ kit em ndam, Jisas Kraist ei, Wu Kun Kai ei, Tipam kᵾn morum ei ndi, tᵾn tᵾpa rapᵾndᵾmba. 2 Ei nga, tᵾn koⱡmina ei mel, Kraist elim koⱡpa wamp mbᵾ nga pora, uⱡ kit mbᵾ kil ngumba pendpa kitim. Ei, tᵾn nga uⱡ kit mbᵾ nga mint mon, wote mᵾi kona wamp mbᵾ nga uⱡ kit mbᵾ nga pora, pendpa kitim ku.

3 Tᵾn ndi, Got nga mi ik kᵾⱡ pilpᵾn, teng ndumᵾn ndam, tᵾn elim kᵾn kupa rump ndupᵾn mormun. 4 Wamp ti ndi, nimba mel, “Na wu Got ei pit,” nimba, wote Got nga mi ik kᵾⱡ, pep rui narᵾm ndam, wamp ei, ik kol rorum. Ik kupa ei, wamp ei kᵾn pi napᵾtᵾm mon! 5 Wote, wamp nam ti ndi, Got elim nga ik ei teng ndum ndam, wamp ei, Got ndi, numan minal ngorum. Wote wamp ei, Got kᵾn rᵾp ropa morum uⱡ ei mba, kai morum. Tᵾn Got kᵾn mormun uⱡ ei, pilip poⱡ nduimin. 6 Wamp nam ti ndi, nimba mel, elim Got kᵾn mor nim ndam, Jisas Kraist uⱡ itim mbᵾ mel itangga!

7 Na nga wamp angmᵾn! Mi ik mon rop ngont ei, ik kont paka ti mon. Ik unt nga ei, puⱡ mondpa pitim ni ku petᵾm. 8 Wote, mi ik enim kᵾn, mon rop ngont ei, ik kont paka ila, ik kupa ei, Kraist kᵾn petᵾm. Ei mel ku, enim kᵾn petᵾm. Ei nambuⱡ emel, uⱡ rumbᵾⱡ mul mbᵾ, omba mana puⱡnga kᵾn, uⱡ rᵾⱡang kupa pi mbᵾ, oⱡa omba petᵾm.

9 Wamp nam ti ndi, Kraist nga rᵾⱡang ila mor nimba, wote ᵾngᵾn ei kᵾn, numan kit pᵾtᵾm ndam, elim ama rumbᵾⱡ ila mint morum. 10 Wamp nam ti ndi, nimba ᵾngᵾn numan ngum ndam, elim rᵾⱡang ila morum. Ei kᵾn, uⱡ kit mat ila, elim kapⱡa mana pi napᵾmba. 11 Wote, wamp nam ti ndi, ᵾngᵾn numan ngui ngangᵾm ndam, elim rumbᵾⱡ ila moⱡpa andrᵾm. Ei kᵾn, elim purum kona ei, pili napᵾtᵾm mon! Nambuⱡ emel, elim nga mong raⱡ rumbᵾⱡ morum.

12 Na nga kangambuⱡa mbᵾ ye! Na ndi, enim mon rop ngont ei, nambuⱡ emel Kraist nga mbi ila, enim nga uⱡ kit etmin mbᵾ wak rundrum. 13 Wutamᵾn enim ndi, Wu Kraist ei, unt puⱡ mondpa murum ei, enim pilik mbi ndurmᵾn ei nga, enim mon ei, rop ngont. Wote, enim kang wu mbᵾ ndi, Seitan rok mana ndurmᵾn ei nga, mon ei, rop ngont. Enim kangambuⱡa mbᵾ ndi, enim Got Tipam pᵾtmᵾn ei nga mon ei, rop ngont. 14 Wutamᵾn enim ndi, Wu Kraist ei, unt puⱡ mondpa murum ei, enim pilik mbi ndurmᵾn ei nga mon ei, rop ngont. Enim kang wu kᵾⱡ mon rop ngont ei, nambuⱡ emel, enim ronduⱡ tek mormun, wote Got nga ik ei, enim kᵾn rukᵾr tetᵾm. Ei nga, enim ndi, Seitan rok mana ndurᵾng.

Mᵾi Kona Ila Mel Mbᵾ Kandkᵾn Numan Ngui Ngᵾngᵾi!

15 Ya mᵾi kona ila uⱡ mbᵾ kᵾn, mel tetᵾm mbᵾ kᵾn, kandᵾk kum pindi nᵾpᵾndᵾi! Mᵾi kona ila mel mbᵾ kandᵾk, kum pending ndam, Got Tipam ei numan ngui nganggᵾrmᵾn mon!

16 Mᵾi kona ila tetᵾm mel mbᵾ, wu amp kandpa kum pindi uⱡ, mong raⱡ ndi kandpa kum pindi uⱡ, wamp nuim raⱡpa mul uⱡ mbᵾ pora, Got Tipam ei kᵾn, tepa ui nawᵾrᵾm mon! Wote uⱡ mbᵾ, mᵾi kona ila ekit orum. 17 Mᵾi kona mbila mel tetᵾm mbᵾ kep, wamp ndi kandpa kum pindi uⱡ mbᵾ kep, akup pora ninim. Wote, Got nga numan pep ropa moⱡum wamp ei, uⱡ nga kᵾnt nga kont moⱡpa mint mba.

Kraist Nga El Rui Wu

18 Na nga kangambuⱡa mbᵾ ye! Ui ei, pora nimba enim! Unt Kraist nga el rui wu minal, ekit uing nᵾtᵾng ni, akup kupa enim. Nambuⱡ emel, ui ei, akup nondpa enim. 19 El rui wamp kᵾⱡ, unt tᵾn nga mou ila ekit purung. Tᵾn kᵾn unt morung, wote tᵾn wak rorung wamp kᵾⱡ, akup tᵾn nga mon.

20 Wote Kraist ndi, enim kᵾn, Muⱡnga Wingti oi ndupa ngurum ei nga, akup enim ik kupa ei pilik mormin. 21 Na enim mon rop ngont ei, ik kupa ei, pili napᵾtmᵾn wamp mbᵾ, nᵾmp rop ngui ngangᵾnt. Wote, ik kupa ei, pᵾtmᵾn ila ik kep nomba ti pepa, ekit ui nawᵾrᵾm mon!

22 Ik kep nga puⱡ wu ei nam? Ik kep nga puⱡ wu ei ndi, nimba mel, “Jisas ei Kraist mon,” nᵾtᵾm. Got Tipam Kangᵾm raⱡ, tᵾpa pei mundrum wu ei, Kraist nga el rui wu ei morum. 23 Wamp nam ti ndi, Kangᵾm tepa mbuⱡ ngum ndam, ei Tipam tᵾpa mbuⱡ ngurum ku. Wote, wamp nam ti ndi, Kangᵾm rukᵾr tᵾtᵾm ndam, Tipam kunda rukᵾr tᵾtᵾm ku.

24 Unt, kuimp tek ik pᵾtᵾng nimbᵾ tᵾk, en enim nga numan ila pendᵾk muⱡᵾi! Ik ei pilik tᵾk, ambuⱡ gi ndung ndam, Tipam Kangᵾm raⱡ, enim kᵾn rᵾmp nangga muⱡing ku. 25 Kraist ndi, tᵾn kᵾn nimba mᵾi rurum ik ei, uⱡ nga kᵾnt nga kont mul uⱡ ei nguimp nitim.

26 Mon rop ngont ik ei, enim wamp mat ndi, ik kol rok ngui ngᵾngeing nimp, mon ei, rop ngont. 27 Wote, Kraist nga Muⱡnga ei, enim oi ndupa ngurum. Muⱡnga ei, enim kᵾn morum ei nga wamp mat ndi, enim ik mat mbo runding, mel mon! Wote, Muⱡnga ei ndi, enim ik mbo rᵾndrᵾm. Ei nga, Muⱡnga ei ndi, enim kundpa nim ik ei kupa, ik kol ti mon! Muⱡnga nga keta teng ndum ndam, Kraist ei, enim kᵾn rump nilinga mormᵾn.

28 Na nga kangambuⱡa mbᵾ ye! Akup enim Nuim Kraist kᵾn rᵾmp nangga, ronduⱡ mundᵾk muⱡᵾi! Wote, elim yant om ei kᵾn, pipil kuⱡi nᵾⱡmin.

29 Wote, enim ndi pilangina, Kraist ei, wu kun kai ti ndam, enim uⱡ kun kai mbᵾ etangina kᵾn kandpa, enim Kraist nga kangambuⱡa mbᵾ nimba.